Ирмос: Вознесе́на Тя ви́девши Це́рковь на Кресте́, / со́лнце пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.
Растерза́в сме́рти врата́ си́лою Твое́ю, / пути́ жи́зни сказа́л еси́, / безсме́ртия же две́ри отве́рзл еси́, ве́рою зову́щим: / сла́ва си́ле Твое́й, Го́споди.
Преполове́ние всех и коне́ц име́яй, / и нача́ла, я́ко безнача́лен, обдержа́й, / стал еси́ посреде́ вопия́: / Боже́ственных, богому́дрии, прииди́те, даро́в наслади́теся.
Я́ко Бог и всех име́яй власть, / я́ко си́лен держа́ву низложи́в сме́рти, / посла́ти обеща́лся еси́, Христе́, Ду́ха Свята́го, / от Отца́ происходя́щаго.
Богородичен: Дае́ши бога́тно благода́ть Тебе́ пою́щим, / и из Тебе́ ро́ждшагося преве́чнаго Сло́ва, Ма́ти неискусобра́чная, / прегреше́ний оставле́ние сим прося́щи, Пречи́стая.
Ирмос: Ты, Го́споди мой, Свет в мир прише́л еси́. / Свет Святы́й, обраща́яй из мра́чна неве́дения, / ве́рою воспева́ющих Тя.
Боже́ственных пра́здников преполове́ния дости́гше, / соверше́нное боже́ственною доброде́телию обучи́тися потщи́мся, богому́дрии.
Я́ко вои́стинну свяще́нное настоя́щее торжество́, преполове́ние, / превели́ких бо пра́здников ко́рень и све́тится обою́ду.
Богородичен: Ум арха́нгельский не мо́жет разуме́ти / Твое́ неизрече́нное из Де́вы и пречи́стое рождество́, Спа́се Многоми́лостиве.
Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися, / ра́ди ми́лости от ребр Твои́х / исте́кшею кро́вию.
Преполове́ние Пятдеся́тницы наста́ днесь, / отсю́ду Боже́ственныя у́бо Па́схи, / Боже́ственнейшею све́тлостию озари́вшееся, / отону́дуже Уте́шителевою благода́тию сия́ющее.
Глаго́лал еси́ в хра́ме, Христе́, предстоя́ иуде́йским собо́ром / Свою́ сла́ву открыва́я, и предъявля́я сро́дство к Роди́телю.
Богородичен: Бу́ди ми предста́тельница и стена́ неруши́мая, / от мирски́х мя собла́знов избавля́ющая, еди́на Богороди́тельнице, / и боже́ственным светоли́тием освеща́ющая.
Пра́зднику зако́нному преполовля́ющуся, / всех Тво́рче и Влады́ко, / к предстоя́щим глаго́лал еси́, Христе́ Бо́же: / прииди́те и почерпи́те во́ду безсме́ртия. / Те́мже Тебе́ припа́даем и ве́рно вопие́м: / щедро́ты Твоя́ да́руй нам, / Ты бо еси́ Исто́чник жи́зни на́шея.
Икос: Олядене́вшую мою́ ду́шу прегреше́ний беззако́ньми, / тече́ньми Твои́х крове́й напо́й, / и покажи́ плодоно́сну доброде́тельми. / Ты бо рекл еси́ всем, е́же приходи́ти к Тебе́, Сло́ве Бо́жий Всесвяты́й, / и во́ду нетле́ния почерпа́ти, живу́ю же и очища́ющую грехи́, / пою́щих сла́вное и Боже́ственное Твое́ воста́ние, / подая́, Благи́й, с высоты́ сше́дшую вои́стинну ученико́м Твои́м Ду́ха кре́пость, / Тебе́ Бо́га ве́дущим, / Ты бо еси́ исто́чник жи́зни на́шея.
Ирмос: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем опаля́еми взыва́ху: / благослове́н еси́ в хра́ме сла́вы Твоея́, Го́споди.
Кре́постию, Спа́се, сме́ртную разо́рь си́лу, / стезю́ жи́зни показа́л еси́ челове́ком, благода́рно Тебе́ зову́щим: / благослове́н еси́ в хра́ме сла́вы Твоея́, Го́споди.
Плоть нося́ща ви́дяще, / не разуме́ша собо́ри евре́йстии Сло́ве Тя Бо́жий, / но мы Тебе́ воспева́ем: / благослове́н еси́ в хра́ме сла́вы Твоея́, Го́споди.
Богородичен: Вы́шняго освяще́нное боже́ственное селе́ние, ра́дуйся! / Тобо́ю бо даде́ся ра́дость, Богоро́дице, вопию́щим: / благослове́на Ты в жена́х еси́, Пренепоро́чная Влады́чице.
Ирмос: Ру́це распросте́р Дании́л, / львов зия́ния в ро́ве затче́, / о́гненную же си́лу угаси́ша, / доброде́телию препоя́савшеся, / благоче́стия рачи́тели о́троцы, взыва́юще: / благослови́те, вся дела́ Госпо́дня, Го́спода.
Красе́н из гро́ба воста́в, Божества́ сла́вою укра́шен, / апо́столом Твои́м, Го́споди, яви́лся еси́, / Ду́ха обеща́яся тем посла́ти де́йство, вопию́щим: / благослови́те, вся дела́ Госпо́дня, Го́спода.
Умертви́в а́да, я́ко Бог живонача́льнейший, / всем источи́л еси́ живо́т ве́чный, / его́же ны́не вообража́ют я́вственнее, / светоно́сных дней сих ра́дости, вопию́щим: / благослови́те, вся дела́ Госпо́дня, Го́спода.
Лучи́, я́ко Со́лнце, Христе́, пра́вды яви́вся, / ми́ру посла́л еси́ апо́столы Твоя́, / нося́щия Тебе́ свет непостижи́мый, / и неве́дения мглу очища́ющия и вопию́щия: / благослови́те, вся дела́ Госпо́дня, Го́спода.
Богородичен: Се ны́не оскуде́ я́ве от Иу́дина пле́мене князь и вождь, / Ты бо, Всенепоро́чная, родила́ еси́, / пре́жде обеща́нное ча́яние язы́ков, Христа́ Бо́га, / Ему́же пое́м: благослови́те, вся дела́ Госпо́дня, Го́спода.
Ирмос: Ка́мень нерукосе́чный / от несеко́мыя горы́ Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся, Тя Богоро́дице велича́ем.
Но́вому и чи́стому жи́тельству, от Христа́ научи́вшеся, / сие́ да́же до конца́ сохрани́ти поле́зно вси потщи́мся, / я́ко да Свята́го Ду́ха прише́ствие восприи́мем.
Ты мое́ сме́ртное, Жизнода́вче, / обложе́нием безсме́ртия, и нетле́ния благода́тию / обле́к, Спа́се, совоскреси́л еси́, / и Отцу́ приве́л еси́, вре́менную мою́ разруши́в брань.
В небе́сное па́ки житие́ зва́ни бы́вше, / хода́тайства си́лою истощи́вшагося да́же и до ра́бия о́браза, и нас возне́сшаго, / Сего́ досто́йно возвели́чим.
Богородичен: Я́ко ко́рень, исто́чник и вину́ нетле́ния, / Тебе́, Де́во, вси ве́рнии уве́девше, похвала́ми почита́ем, / Ты бо ипоста́сное безсме́ртие нам источи́ла еси́.
глас 4
Творение Кир Феофана
Ирмос: Мо́ря Чермну́ю пучи́ну, невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.
Припев: Сла́ва Тебе́, Бо́же наш, сла́ва Тебе́.
Пле́щуще с весе́лием днесь ве́рнии возопии́м: коль чу́дна дела́ Твоя́ Христе́, и вели́ка си́ла, на́ше единомы́слие и согла́сие соде́лавый!
Припев: Сла́ва Тебе́, Бо́же наш, сла́ва Тебе́.
День ра́достный богому́дреннии прииди́те соверши́м, ны́не не́бо и земля́ весели́тся, и А́нгелов чи́ни, и челове́ков собра́ния изря́дно пра́зднующе.
Припев: Сла́ва Тебе́, Бо́же наш, сла́ва Тебе́.
Преве́лие благодея́ние ви́дяще, рука́ми воспле́щим, разстоя́щияся у́ды Христо́вы, совоку́плены во еди́нство, и Бо́га похва́лим мир пода́вшаго.
Слава: Да́шася Це́ркви днесь победи́тельная, Богодви́жным манове́нием и сове́том, Михаи́ла же и Феодо́ры, благоче́стно ве́ру содержа́щих царе́й на́ших.
И ныне: Ору́жия злочести́вых исчезо́ша я́ве ересе́й, храм бо Твой Пречи́стая Чи́стая, во образе́х украша́емый всеблаголе́пно зря́ще, ны́не всесвяще́нно ра́дуемся.
Ирмос: Весели́тся о Тебе́ Це́рковь Твоя́, Христе́, зову́щи: Ты моя́ кре́пость, Го́споди, и прибе́жище, и утвержде́ние.
Припев: Сла́ва Тебе́, Бо́же наш, сла́ва Тебе́.
Не ктому́ нечести́вых еретико́в ны́не бровь взе́млется: Бо́жия бо си́ла правосла́вие удержа́ла есть.
Припев: Сла́ва Тебе́, Бо́же наш, сла́ва Тебе́.
О́блацы проро́честии, животворя́щую с Небесе́ днесь ро́су нам да кропя́т, на воста́ние ве́ры.
Припев: Сла́ва Тебе́, Бо́же наш, сла́ва Тебе́.
Благогла́сно та́йныя апо́столов Христо́вых трубы́, па́че естества́ да вопию́т, честны́х образо́в исправле́ние.
Слава: Воспои́м Христа́, показа́вшаго нам цари́цу благочести́вую, христолюби́вую, с Боговенча́нною о́траслию.
И ныне: Селе́ние Твое́ свяще́нное дости́гше ве́рнии, Пречи́стая, светови́дною благода́тию ны́не озари́тися, мо́лимся.
Господи, помилуй. (Трижды)
Боже́ственный Твой зрак, во о́бразе образу́юще, Христе́, я́сно вопие́м Рождество́, чудеса́ неизглаго́ланная, во́льное распя́тие. Отону́дуже бе́сове отго́нятся стра́хом, и злосла́внии в посупле́нии рыда́ют, я́ко сих соприча́стницы.
Слава: Зра́ками проро́ков, апо́столов ви́дами, му́чеников свяще́нных, и святы́х всех ико́нами, и изображе́ньми свяще́нно красу́ется, Жениха́ же мы́сленнаго и Неве́сты украша́ется у́мными красова́ньми, Ма́ти вы́шний Сио́н.
И ныне: Любо́вию, Чи́стая, Твою́ святу́ю ико́ну почита́ющим, и Бо́жию Тя и́стинную Ма́терь согла́сно возвеща́ющим, и ве́рно покланя́ющимся Ти, храни́тельница яви́лася еси́, и держа́вное предста́тельство, отвраща́ющи вся́кое лю́тое дале́че сих, я́ко вся могу́щая.
Ирмос: Вознесе́на Тя ви́девши Це́рковь на Кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Сла́ва Тебе́, Бо́же наш, сла́ва Тебе́.
Наи́тием Боже́ственнаго Уте́шителя, Твой храм освяти́, и прише́ствием Сего́ ерети́ческую пре́лесть отжени́, Сло́ве Бо́жий Многоми́лостиве.
Припев: Сла́ва Тебе́, Бо́же наш, сла́ва Тебе́.
Ну́жднейшаго изба́вивый злоче́стия Твоя́ лю́ди, покажи́ благоче́стия ре́вностию разжже́ны, и ве́рою взыва́ющия: сла́ва си́ле Твое́й, Го́споди.
Припев: Сла́ва Тебе́, Бо́же наш, сла́ва Тебе́.
Священнообра́зными изображе́ньми, образо́в Христо́вых зря́ще и Богоро́дицы, сия́ющая Боже́ственная селе́ния, священноле́пно ра́дуемся.
Слава: Цари́ца по обоему́ укра́шена, и́стиннаго возжеле́вши Христо́ва Ца́рства, Сего́ написа́ о́браз пречи́стый, и святы́х изображе́ния.
И ныне: Воплоще́нна роди́вши Боже́ственнаго Сло́ва, Боголе́пное освяще́ние Благода́тная, Сего́ показа́ла еси́, те́мже Твой храм светови́дный обновля́ем.
Ирмос: Ты, Го́споди, мой Свет, в мир прише́л еси́. Свет Святы́й, обраща́яй из мра́чна неве́дения, ве́рою воспева́ющих Тя.
Припев: Сла́ва Тебе́, Бо́же наш, сла́ва Тебе́.
Положи́, Го́споди, Твое́й Це́ркви утвержде́ние, непрекло́нней пребы́ти в век ве́ка от смяте́ний ересе́й.
Припев: Сла́ва Тебе́, Бо́же наш, сла́ва Тебе́.
Во всю зе́млю све́тлость возсия́ свы́ше, да́ннаго ве́рным весе́лия, и Боже́ственнаго заступле́ния.
Припев: Сла́ва Тебе́, Бо́же наш, сла́ва Тебе́.
Еди́не Благи́й, и Исто́чниче бла́гости, Ты возвы́си рог благове́рнаго Импера́тора на́шего, чту́щаго о́браз Твой.
Слава: Свет незаходи́мый нам благоче́стия возсия́, веле́нием Богодухнове́нным ве́рных па́стырей, и ма́нием Богому́дрым.
И ныне: Обнови́ нам дре́внее благоле́пие, Пречи́стая Богома́ти, и дом Твой сей освяти́ Твое́ю благода́тию.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею Кро́вию.
Припев: Сла́ва Тебе́, Бо́же наш, сла́ва Тебе́.
Пи́шется и почита́ется ве́рно покланя́емый о́браз Влады́ки, и прие́млет па́ки Це́рковь дерзнове́ние, благоче́стно Спа́са прославля́ющи.
Припев: Сла́ва Тебе́, Бо́же наш, сла́ва Тебе́.
Обнажа́ется се́тования, и тьмы ересе́й Христо́ва Це́рковь, и но́сит ри́зу весе́лия, и Боже́ственною и светоно́сною покрыва́ется благода́тию.
Слава: Благосла́вия дре́вняго осия́ния получи́ правосла́вных собо́р, Феодо́ры манове́нием цари́цы, и ея́ сы́на благочести́ваго Михаи́ла самоде́ржца.
И ныне: Дре́вле свиде́ния повеле́вый бы́ти ски́нии, я́ко в ски́нии слове́сней, в Тебе́ живе́т Еди́н Препросла́вленный, прославля́яй храм Твой, Де́во, чудесы́.
Господи, помилуй. (Трижды) Слава, И ныне:
Неопи́санное Сло́во О́тчее, из Тебе́, Богоро́дице, описа́ся воплоща́емь, и оскве́рншийся о́браз в дре́внее вообрази́в, Боже́ственною добро́тою смеси́; но испове́дающе спасе́ние, де́лом и сло́вом, сие́ вообража́ем.
Сие́ смотре́ния та́инство, дре́вле проро́цы Богови́дно вдохнове́ни бы́вше, нас ра́ди в концы́ веко́в дости́гших предвозвести́ша, получи́вше сего́ сия́ния. Ра́зум у́бо Боже́ственный от него́ взе́мше, Еди́наго Го́спода Бо́га зна́ем, в трие́х Ипоста́сех покланя́емаго, и Тому́ еди́ному служа́ще, еди́ну ве́ру, и еди́но креще́ние иму́ще, во Христа́ облеко́хомся, но испове́дающе спасе́ние, де́лом и сло́вом, сие́ вообража́ем.
Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Сла́ва Тебе́, Бо́же наш, сла́ва Тебе́.
Да сликовству́ет Церко́вней све́тлости любо́вию Боже́ственною А́нгельское во́инство, Богому́дренно воспева́ющее: благослове́н еси́ в хра́ме сла́вы Твоея́, Го́споди.
Припев: Сла́ва Тебе́, Бо́же наш, сла́ва Тебе́.
Це́рковь перворожде́нных, и торжество́ ра́дуется, зря́ще ны́не Боже́ственныя лю́ди, единому́дренно воспева́ющия: благослове́н еси́ в хра́ме сла́вы Твоея́, Го́споди.
Слава: Изба́влени пре́жде мра́чныя е́реси, ма́нием Феодо́ры достоле́пныя цари́цы, воспева́ем: благослове́н еси́ в хра́ме сла́вы Твоея́, Го́споди.
И ныне: Па́че вы́шних ликостоя́ний, вознесла́ся еси́ Всечи́стая, еди́на бы́вши Ма́ти Вседе́теля; ра́дующеся у́бо взыва́ем: благослове́нна Ты еси́ в жена́х, Всенепоро́чная Влады́чице.
Ирмос: Ру́це распросте́р Дании́л, львов зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся дела́ Госпо́дня Го́спода.
Припев: Сла́ва Тебе́, Бо́же наш, сла́ва Тебе́.
Зако́ны Це́ркве оте́ческия сохраня́юще, о́бразы пи́шем, и лобза́им усты́, и се́рдцем, и хоте́нием Христо́вы, и Его́ святы́х, зову́ще: благослови́те вся дела́ Госпо́дня Го́спода.
Припев: Сла́ва Тебе́, Бо́же наш, сла́ва Тебе́.
На первообра́зное я́ве о́браза, по́честь и поклоне́ние вознося́ще, чтим, Богоглаго́ливых уче́нием после́дующе, и Христу́ ве́рою зове́м: благослови́те вся дела́ Госпо́дня Го́спода.
Слава: Ум озари́вши просвеще́нием Боже́ственнаго Ду́ха, честна́я цари́ца, плоды́ Богому́дренныя иму́щи, благоле́пие возлюби́ Це́ркве Христо́вы, и красоту́, благословя́щи ку́пно с ве́рными Иису́са Богочелове́ка.
И ныне: Луча́ми све́та у́мнаго, освеща́емый Боже́ственный дом Твой, осеня́ет ны́не всех о́блаком Ду́ха, и освяща́ет ве́рныя согла́сно пою́щия: благослови́те вся дела́ Госпо́дня Го́спода.
Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Тем веселя́щеся Тя, Богоро́дице, велича́ем.
Припев: Сла́ва Тебе́, Бо́же наш, сла́ва Тебе́.
Священнописа́ньми образо́в укра́шеную, зря́ще па́ки честну́ю Це́рковь, со благогове́нием вси притеце́м и Бо́гу возопии́м: Тебе́ велича́ем, Трисвяты́й.
Припев: Сла́ва Тебе́, Бо́же наш, сла́ва Тебе́.
Честь и сла́ву стяжа́вши Це́рковь, Крест Твой и честны́я ико́ны, и святы́х изображе́ния, с весе́лием, Влады́ко, и ра́достию велича́ет Тя.
Слава: Освети́ Боже́ственною Твое́ю сла́вою лю́ди на́ши, Ще́дрый, и ополче́ньми А́нгельскими, и всеору́жествы сия́ огради́, язы́ков свире́пство покаря́я им, Влады́ко.
И ныне: Взя́тся прама́тере Е́вы осужде́ние, Богоро́дице, я́ко Ты всех Влады́ку несказа́нно, Чи́стая, родила́ еси́. Его́же и ны́не подо́бие на ико́нах целу́ем.
глас 4
Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Да́ждь на́м сло́во, Сло́ве Бо́жий, Иису́се Всеблаги́й, воспе́ти ра́достное явле́ние ико́ны ро́ждшия Тя́ Богоневе́сты и пресла́вная Тоя́ чудеса́, в ни́хже си́ла Твоя́ Боже́ственная сла́вно просла́вися.
О, преди́внаго Твоего́ чудесе́, Влады́чице, и мно́гаго милосе́рдия к лю́дем: се́ бо ико́ну Твою́ честну́ю в бы́лии тра́вном солнцеподо́бным сия́нием иере́ю благогове́йну явля́еши дне́сь и исцеле́ний мно́жество от Нея́ источа́еши неду́жным, я́ко Всеми́лостивая.
Ты́, о Богома́ти, ро́ждшая Претерпе́вшаго на́с ра́ди на дре́ве Кре́стнем распя́тие, умоли́ Его́ бла́гость, е́же страда́ние Его́ всегда́ па́мятовати, во́лю же Его́ Боже́ственную твори́ти и бла́г Небе́сных насле́дники бы́ти.
Влады́чице Всеблага́я, умоли́ Сладча́йшаго Сы́на Твоего́ и Го́спода, рукописа́ние гре́х на́ших на Кресте́ пригвозди́вшаго, да сподо́бит на́с досто́йно одесну́ю Его́ ста́ти и гла́с благи́й Его́ слы́шати, егда́ прии́дет во сла́ве Свое́й.