Ирмос: Юноши благочестивыя, пещи огненней приобщившияся, шумящ дух росный невредимы сохрани, и Божия Ангела снизхождение. Темже в пламени орошаеми благодарственно воспеваху: препетый отцев, Господи и Боже, благословен еси.
Слава, Господи, святому Богоявлению Твоему.
Якоже на небеси с трепетом и чудом предстояху, во Иордане силы Ангельския, смотряюще толика Божия схождения: яко держай превышних вод состав, в водах Плотоносец стояше, Бог отцев наших. (Дважды)
Слава: Облак древле и море Божественнаго проображаху крещения чудо, в нихже древнии крестишася, исходяще законнии людие. Море же бе образ воды, и облак Духа: имиже совершаеми, благословен еси, зовем, Господи Боже, во веки.
И ныне: Вси вернии, в Немже совершение прияхом, богословяще немолчно со Ангелы, прославим Отца и Сына и Духа Святаго; се бо Троица Ипостасьми Единосущная, Един же Бог, Емуже поем: благословен еси, Господи Боже, во веки.
Ирмос: Тайну преславную Вавилонская показа пещь, источившая росу, яко струями имяше невещественный Огнь восприяти Иордан, и объяти плотию крещаема Зиждителя; Егоже благословят людие и превозносят во вся веки.
Слава, Господи, святому Богоявлению Твоему.
Отложи страх весь, Избавитель Предтечи рече, Мне же повинися, яко Благому, Мне приступи, сие бо естеством бых. Моим повелением покорися, и крести Мя сошедшаго: Егоже благословят людие и превозносят во вся веки. (Дважды.)
Слава: Глаголы якоже услыша Креститель Владычни, с трепетом длань простирает: обаче же рукою коснувся верху Зиждителя своего, Крещшемуся вопияше: освяти мя, Ты бо еси Бог мой, Егоже благословят людие и превозносят во вся веки.
И ныне: Троицы явление во Иордане бысть, Самое бо Пребожественное естество Отец возгласи: Сей крещаемый Сын возлюбленный Мой; Дух же прииде к подобному, Его же благословят людие и превозносят во вся веки.
Ирмос: Недоумеет всяк язык благохвалити по достоянию, изумевает же ум и премирный пети Тя, Богородице. Обаче Благая сущи, веру приими, ибо любовь веси Божественную нашу: Ты бо христиан еси Предстательница, Тя величаем.
Слава, Господи, святому Богоявлению Твоему.
Давиде, прииди духом к просвещенным, ныне приступите, пой к Богу верою, глаголя: просветитеся, сей нищий воззва Адам в падении; ибо того услыша Господь, пришед струями Иорданскими, тленнаго же обнови. (Дважды)
Слава: Исаиа, измыйтеся, очиститеся, глаголет, лукавствия пред Господем оставите, жаждущии на воду живу идите: кропит бо водою, обновляя Христос приступающия к Нему верою, и к животу нестареемому крещает Духом.
И ныне: Соблюдаемся благодатию вернии, и печатию: яко бо губителя бежаша, прага евреи древле окровавлена. Тако и нам исходное Божественное сие, пакибытия баня будет. Отсюду и Троицы узрим Свет незаходимый.
О паче ума Рождества Твоего чудес, Невесто Всечистая, Мати Благословенная! Еюже получивше всесовершенное спасение, достойно хвалим, яко Благодетеля, дар носяще песнь благодарения.
глас 2
Ирмос: Шествует морскую волнящуюся бурю, сушу абие Израиль явльшуюся. Чермный же понт тристаты египетская покры купно, водостланен гроб, силою крепкою десницы Владычни.
Утру явльшуся человеком светоносну ныне из пустыни, к водам Иорданским преклонил еси, Царю солнца, Твою выю, лика мрачна родоначальника исхитити, скверны же всякия очистити тварь.
Безначальне, струям спогребшася Тебе, Слове, новаго преводиши, истлевшаго лестию, Сего несказанно от Отца прием глас державен: Сей возлюбленный, равен же Мне Отрок естеством.
Ирмос: Елицы древних изрешихомся сетей брашен львов, сотренных членовными, радуимся и разширим уста, слово плетуще от словес сладкопения, имже к нам наслаждается дарований.
Умерщвление первее насадивый твари, зверя злодейственнаго воображься в естество, омрачается плотским пришествием: утру явльшуся, приразився Владыце сокрушити свою враждебную главу.
Влечет к себе Богозданное естество, утробы мучителя погребенное пределы; раждается паки земнородных Обновление, дело державно совершая Владыка: прииде бо, тое очистити хотя.
Егда явлением Твоим просветил еси всяческая, тогда сланое неверия море побеже, и Иордан, доле текий, возвратися, к Небеси возвышая нас. Но высотою Божественных заповедей Твоих соблюди, Христе Боже, молитвами Богородицы и помилуй нас.
Ирмос: Огнем очищся тайнаго зрения, поя пророк человеков новодейство, возглашает глас, Духом плещущ, воплощение являющ неизреченна Слова, Имже сильных державы сотрошася.
Послан от Отца, всесветлое Слово, нощи отгнати зломрачное стремление, и искоренити грядеши человеков грехи, сыны же привлещи, Твоим Крещением, Блаже, светлы от струй Иорданских.
Самое провидев нареченное Слово, ясно проповедник вопиет твари: Сей прежде мене, вторый плотию сообразен, просия Божественною силою враждебный наш отъяти грех.
Пажить у Себе животворну нося, уловляет змиев, гнездам натекая многими сетьми, низлагая, Бог Слово, запинает же уязвившаго всемирный род, сего потребль, избавляет тварь.
Ирмос: Врага темнаго и оскверненнаго яда очищением Духа измовени, к новой пристахом неблазненной стези, вводящей в неприступную радость, Единем приступну, имже Бог примирися.
Видев Зиждитель во мраце прегрешений пленицами неизбежными егоже вообрази персты, поставляет на обою раму, воздвиг горе, ныне во многотекущих водах омывая студа древняго Адамова злаго нрава.
Со благочестием притецем прилежно ко источником пречистым течения спасительнаго, Слово усмотряюще от Нетленныя, почерпала приносяще жажди Божественныя, мира сладостне исцеляя недуг.
Ирмос: Вожделеннаго, явствова со всеблаженным гласом Отец, Егоже из чрева отрыгну: ей,—глаголет,— Сей соестествен Сын, Сый светозарен, произниче из человеча рода: Слово же Мое живо и Человек промышлением.
От глубиннаго льва, тревечерний странне пророк во внутренних валяяся, абие произыде, пакибытия спасение от змия человекоубийцы всем предъявляя в последняя лета.
Отверсту Небу всесветлых писаний, ученик зрит от Отца посылаемый, пребывающ же Дух на Пречистем Слове, нашед яко голубь неизреченным образом, людем же является, пришедшим ко Владыце.
Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси, Свет Неприступный.
Галилеи язычестей, Завулонстей стране и Неффалимстей земли, якоже рече пророк, Свет велик возсия, Христос. Омраченным светла явися Заря, из Вифлеема облистающая, паче же из Марии Господь, всей вселенней возсиявает лучи Солнце правды. Темже, иже от Адама назии, приидите вси, облечемся в Него, да согреемся, покрывает бо нагия и просвещает темныя. Пришел еси и явился еси, Свет Неприступный.
Ирмос: Опали струею змиевы главы пещный высокий пламень, юноши носящ благочестивыя, утишивый неудободержимую мглу из греха всю же омывает росою Духа.
Тебе живописующий ассирийский пламень ужасен поставляеши, в росу преведен; темже вода ныне, якоже пламень, одеваяй, вредную злобу, Христе, прикровенную опаляет, от поползновенныя стези призывающи.
Раздельшуся Иордану древле, по суху преходят людие Израильтестии, Тебе, Державнейшаго, содержаща тварь некоснительне, ныне в водах написующии, к нетленней и полезней стези.
Вемы, первее всепагубный потоп милостивно Тя всех во тлю привести, о, тревеликая сотворяя и странная! Ныне же потопльша, Христе, грех за благосердие и человеческое спасение.
Ирмос: Свободна убо тварь познавается и сынове Света прежде омраченнии; един стенет тьмы предстатель. Ныне да благословит усердно Виновнаго прежде окаянное языков всенаследие.
Трие Боговиднии, во огни орошаеми, озаряющеся треми всесветле святынями, яве показоваху Превышнее Естество смешением человеческим, огнепалящее росою милостивно всяку пагубную лесть.
Да убелится всякое земное естество, от падения ныне на Небо возводимо, Имже бо вся соблюдаются, Словом, текущими струями омывшеся, прегрешений прежних убеже, пресветло измовено.
Ирмос: О, паче ума Рождества Твоего чудес! Невесто Всечистая, Мати Благословенная, Еюже получивше всесовершенное спасение, достойно хвалим, яко Благодетеля, дар носяще — песнь благодарения.
Днесь Иоанн крещает Владыку, во струях Иорданских.
Днесь Владыка водами погребает человеческий грех.
Уведехом Моисею купиною явленная, гряди, странными уставы соделанная: яко бо спасеся, Огнь носящи, Дева, Светоносна рождши Благодетеля, во Иорданских же струях явленна.
Днесь Владыка свыше свидетельствуется, Сын возлюбленный.
Днесь Владыка прииде освятити естество водное.
Днесь Владыка Крещение приемлет рукою Предтечевою.
Помазуеши, совершая человеческое существо, Царю Безначальне, Духа общением, струями чистыми отмыв и тьмы крепость же посрамль возвышенную, ныне в безпрестаннем воздати житии.
Явися Спас, благодать и истина, во струях Иорданских и сущия во тьме и сени спящия просветил есть, ибо прииде и явися Свет Неприступный.
глас 2
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Припев: Слава Тебе, Боже наш, слава Тебе.
Осмерица дней, носящая образ будущаго, Твоею Христе просвещается и освящается вольною нищетою; в сей бо законно обрезался еси плотию. (Дважды.)
Слава: Обрезание приемлет осмодневное Христос Своего Рождества, и сего днесь сень спрятает, свет возсиявая новыя благодати.
И ныне: Тойже.
Ирмос: Утверди нас в Тебе, Господи, древом умерщвлей грех и страх Твой всади в сердца нас, поющих Тя.
Слава Тебе, Боже наш, слава Тебе.
Слово воплощшееся пресущественное, в престатие закона обрезася; начаток же Божественныя благодати, и жизни нетленныя нам подаде. (Дважды.)
Слава: Закона исполнитель, не яко сопротивен Богу сый Христос воплотивыйся показася, и сподобися волею обрезатися осмодневен.
И ныне: Тойже.
Господи, помилуй. (Трижды.) Слава, и ныне:
Яко сый бездна человеколюбия, одеялся еси, Владыко, в зрак рабий, и плотию обрезался еси, даруя всем человеком великую Твою милость.
Ирмос: Услышах, Господи, слух Твоего смотрения, и прославих Тя, Едине Человеколюбче.
Слава Тебе, Боже наш, слава Тебе.
Обрезание преста, отнележе Христос волею обрезася, язык множество спасая благодатию. (Дважды.)
Слава: Будущаго непрестанную осмаго века жизнь изображает, в нюже Владыка обрезася плотию.
И ныне: Тойже.
Ирмос: Света подателю, и веков Творче, Господи, во свете Твоих повелений настави нас; разве бо Тебе иного Бога не знаем.
Слава Тебе, Боже наш, слава Тебе.
Ты от Девы Матере несказанно прошед, Господи, и в человеческий ныне сподобился еси одеятися образ, яко младенец законно, закон исполнил еси. (Дважды )
Слава: Нощи уподобися, яко сень законную любящи Израиля, рождшая, из неяже облиставший свет мира Христос явися.
И ныне: Тойже.
Ирмос: Бездна мя многа греховная окружает, и вопию Ти, пророка подражаяй: от тли мя, Господи, возведи.
Слава Тебе, Боже наш, слава Тебе.
Прият конец закон, отнележе Христос младенствовав, исполнитель закона сый, обрезание восприят, и разреши законную клятву. (Дважды)
Слава: Субботство, обрезание же шатания еврейскаго, явльшагося Христа мановением преста, и возсия благодати весна.
И ныне: Тойже.
Господи, помилуй. (Трижды.) Слава, и ныне:
Всех Господь обрезание терпит, и человеческая прегрешения яко Благ обрезует, дает спасение днесь миру; радуется же в вышних и Создателев иерарх и светоносный Божественный таинник Христов Василий.
Ирмос: Образу златому на поле Деире служиму, трие Твоя отроцы небрегоша безбожнаго веления, посреде же огня ввержени, орошаеми пояху: благословен еси, Боже отец наших.
Слава Тебе, Боже наш, слава Тебе.
Светло и пресветло Рождество Христово, и будущаго обновления подписавшее таинство днесь: яко законным чином Спас обрезуется, не яко Бог, но яко человек, и закона исполнение. (Дважды.)
Слава: Закон исполняя закона Творец, плотию днесь волею обрезуется, обрезание содевая греховныя зимы, и звати даруя: благословен еси, Боже отец наших.
И ныне: Тойже.
Ирмос: Неизреченною мудростию составльшаго всяческая Бога Слова, и от не сущих во еже быти приведшаго, благословите дела яко Господа, и превозносите во вся веки.
Слава Тебе, Боже наш, слава Тебе.
Во осмый день обрезуется яко младенец Владыка; Иисуса же приемлет именование, яко мира есть Спас и Господь. (Дважды)
Слава: Ко Христову Рождеству достойно осмый спряжеся, святителя всеславная память, юже почитающе верою, поем Господа и превозносим во веки.
И ныне: Тойже.
Ирмос: Яже прежде солнца светильника Бога возсиявшаго, плотски к нам пришедшаго из боку Девичу, неизреченно воплотившая, благословенная, Всечистая, Тя, Богородице, величаем.
Слава Тебе, Боже наш, слава Тебе.
Прешед пределы Христос человеческаго всего естества, преестественно из Девы раждается; и писание законное якоже повелевает, плотию обрезается, и исполнитель закона является. (Дважды)
Слава: Приидите Владыки славная Христова именования во святыни торжествуим: Иисус бо боголепно наречеся днесь. С симиже и память святителя величаем.
И ныне: Тойже.
глас 4
Ирмос: Тристаты крепкия, Рождейся от Девы, безстрастия во глубине души тричастное потопи, молюся, да Тебе, яко в тимпане, во умерщвлении телесе победное воспою пение.
Яко утро благолепно, Солнца предтекий, неплодныя прозябение проповедает яве Девы Рождество, всей ныне вселенней сияет концем просвещение благочестия и благодати.
Пророк Вышняго истинно наречешися, предъидеши бо пред лицем Христа,— вопиет тебе, сыну, Иоанне прехвальне, Духом Захария Пресвятым носим,— путь уготовати Зиждителю.
Глаголы Гавриила Захария слышав, вещания Божественнаго, явися непокорив, и молчанием осуждается, решится же внезапу от сего: глас бо родися Слова, Иоанн Предтеча.
Богородичен: Град Божий, Всецаря Богоприятное селение, сокровище честное, Богородице Пренепорочная, сохрани достояние Твое, присно восхваляющее Тя и чтущее верою Рождество Твое.
Ирмос: Не мудростию, и силою, и богатством хвалимся, но Тобою, Отчею Ипостасною Мудростию, Христе: несть бо свят, паче Тебе, Человеколюбче.
Владычне убо от Девы совершается рождение, но раба, любезна от старицы и неплодныя матере: в лепоту предтичет убо чудо чудеси.
Старица и неплоды Деву Матерь лобзает, познавши неложно Сея Рождество, яко разрешися соуз неплодства Божественным хотением.
Богородичен: Неискусобрачно Бога воплощенна рождши, страстей прилоги обуреваемаго мя утверди: несть бо, Пречистая, разве Тебе помощницы.
Захариин глас светло разреши Словесе глас рождься, Предтеча, и закона неплодие всем показа, зовый: покайтеся, сущии на земли, се бо прииде и явися Иисус, вся хотя избавити от первыя клятвы, просвещая Крещением. Воистину чудо преславно!
Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Таин неизреченных предходит таинство новосечением законоположения естественнаго, болезни разрешение провозвещающи, исправление сея, Христе, и обожение.
Исаия от Отца Сыну пророчествова, воплотитися хотящему: Ангела земнородна равноангельна се Аз посылаю пред лицем Твоим, зовуща: слава, Христе, силе Твоей.
Служити, яко раб Владыце, родихся: на се бо приидох, Сего возвестити пришествие, яко да Девы Рождество предуверит, преславно неплодствующая старица прозябши.
Богородичен: Святая Богородица, в Нюже вселитися благоизволи, яко во благовонен дом, Слово Отчее Пребожественное, не растлеся утробою, ни поболе, ибо роди Еммануила, Бога и Человека.
Ирмос: Ныне востану, пророчески рече Бог, ныне прославлюся, ныне вознесуся, падшаго прием от Девы и к свету умному возносяй Моего Божества.
Земля израсти всеистинна проповедника, гласа, всем проповедающа языком Духа, Девы Сына, Правду, с Небесе на нас приничущую вещию телесною.
Положи Господь всеистинна светильника тя Христова, вся просвещающаго, едины одевающа враждующия Ему, яко ризою, в студ, неложно Божия Слова Сына проповедающа.
Веселится вся тварь твоим рождеством, Божественне: ты бо землен Ангел, Предтече, и Небесный человек показался еси, Небеснаго Бога провозвещая нам воплощенна.
Богородичен: От Тебе раждается от Отца Сый, с Тобою присно, Слово присносущное и нераздельное, яко Сын Единородный, и напоследок от Девы Тойже от Святаго воплощается Духа.
Ирмос: Приидох во глубины морския, и потопила мя есть буря многих грехов, но, яко Бог, из глубины возведи живот мой, Многомилостиве.
Бога Слова познал еси, яко пророк, в матерней утробе, и, сея языка употребив, богословиши в темне чертозе, обожаемь Светом Неприступным.
Немолчно, яко глас вопиющаго, Избавителя мира, Крестителю, моля не престай душевное разрешити неплодие поющих твое рождество.
Богородичен: Неприступнаго Божества селение, Чистая, Твоя утроба явися, о Богородице, на нюже без боязни Небеснии чинове взирати не могут.
Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча.
Восхвалим ныне Господня Предтечу, егоже священнику Елисаветь роди из ложесн неплодных, но не без семене: Христос бо един вместилище пройде непроходимо без семене. Иоанна неплоды роди, без мужа же сего не роди, Иисуса же, осенением Отца и Духа Божия, Дева роди Чистая. Но Безсеменному явися от неплодныя пророк и проповедник, вкупе и Предтеча.
Ирмос: Юноши три в Вавилоне, веление мучителево на буйство преложше, посреде пламене вопияху: благословен еси, Господи, Боже отец наших.
Бяше первее во мраце всяко земнородных естество, о Предтече, но утро, вопия, явился еси: благословен еси, Господи, Боже отец наших.
Недуговавшее исцели естество все, славное от неплодныя твое рождество, научившее, Предтече, пети: благословен еси, Господи, Боже отец наших.
Родился еси, Предтече, от неплодныя, прииде бо всеистинно, закону неплодствующу, благодать, Христу поющи: благословен еси, Господи, Боже отец наших.
Богородичен: Дево Благословенная, моли о нас, молящих Тя, на Тя бо уповаем вси и Тебе вопием: Владычице, не презри рабов Твоих.
Ирмос: Избавителю всех Всесильне, посреде пламене благочествовавшия, снизшед, оросил еси и научил еси пети: вся дела, благословите, пойте Господа.
Законоположник раб бяше Моисей, Иисус же — Бог Завета Новаго, ныне же обоих Предтеча поет, яко ходатай: вся дела, благословите Господня Господа.
От пуста чрева горлица прииде, яко богосажденная дубрава, ныне принесе Церкви Предтечу Христова и воспевает: вся дела, благословите Господня Господа.
Богоноснии людие, язык свят, горлице Христовей уподобитеся и медоточно воспойте, в целомудрии живуще: вся дела, благословите Господня Господа.
Троичен: Тричисленным светом озаряеми, Несозданное Единое Божество, немолчными усты православно вопиюще, почтим: вся дела, благословите Господня Господа.
Ирмос: Сокровенное Божие неизреченное в Тебе совершается явственное таинство, Дево Пречистая, ибо Бог из Тебе воплотися за милосердие. Темже Тя яко Богородицу величаем.
Се глас Предтечи неплодным и пустым предста сердцам вопиющ: путь Христов ныне уготовите, яко во славе грядет, Емуже повинующеся, величаем.
Якоже древле Духом Пресвятым яве проповедал еси Сына, Предтече, Агнца Божия, мира вземлющаго грехи, стаду твоему согрешений разрешение испроси.
Единицу Тричисленную, Троицу Единосущную, православно поюще, вернии, прославим, богодетельне нас озаряющую и светлостьми незаходимаго света исполняющую души наша.
Богородичен: Всеми владычествующая творении, людем Твоим даруй победу одоления, непокориваго подложи под нозе воинству: да Тя яко Богородицу величаем.
Предтечево днесь радостотворное рождение сетование решит отча безгласия и рождшия неплодство, возвещает же настоящую радость и веселие. Темже и вся тварь светло тое празднует.
глас 3
Ирмос: Сущу глубородительную землю солнце нашествова иногда, яко стена бо огусте обаполы вода, людем пешомореходящим, и богоугодно поющим: поим Господеви, славно бо прославися.
Припев: Слава Тебе, Боже наш, слава Тебе.
Да каплют воду облацы, солнце бо на облаце легце носимо настало есть, на нетленную руку, Христос в церкви, яко младенец. Темже, вернии, возопиим: поим Господеви, славно бо прославися (Дважды).
Слава: Крепитеся руце Симеони старостию ослабленнии, лыста же претружденна старча, правобыстро движитася Христу на сретение, лик со безплотными составльше, поим Господеви, славно бо прославися.
И ныне: Разумом простертыя небеса веселитеся, и радуйся, земле: из пребожественных бо недр хитрец прошед Христос, Материю Девою Богу Отцу приносится Младенец, иже прежде всех: славно бо прославися.
Ирмос: Утверждение на Тя надеющихся, утверди, Господи, церковь, юже стяжал еси честною Твоею кровию.
Слава Тебе, Боже наш, слава Тебе.
Перворожден из Отца прежде век, перворожден Младенец из Девы нетленныя, Адаму руку простирая явися (Дважды).
Слава: Младоумна бывша прелестию первозданного паки исправляяй Бог Слово, младенствовав явися.
И ныне: Земли исчадие, паки потекшее в ню, Божества сообразное естество Зиждитель, яко непреложне, младенствовав яви.
На горе Синайстей древле виде Моисей задняя Божия, и тонкий Божественный глас сподобися во мраце же и вихре слышати: ныне же Симеон воплощенного Бога, непреложне нас ради на руки прият, и радостно тщашеся ити от сущих зде к животу вечному. Темже вопияше: ныне отпущаеши раба Твоего, Владыко.
Ирмос: Покрыла есть небеса добродетель Твоя, Христе, из кивота бо прошед, святыни Твоея нетленныя Матере, в храме славы Твоея явился еси, яко Младенец руконосим: и исполнишася вся Твоего хваления.
Слава Тебе, Боже наш, слава Тебе.
Радуйся, Симеоне, неизреченных таиниче, Богородица вопияше, о немже от Святаго древле известися тебе Духа, младенствовавшего вся твоего хваления (Дважды).
Слава: На негоже уповал еси, Симеоне, возраст детищный радуяся подъими Христа, Израиля божественнаго утешение, закона Творца и Владыку, исполняющаго закона чин, зовый Ему: исполнишася вся Твоего хваления.
И ныне: Видя Симеон слово Безначальное, с плотию яко на престоле херувимстем Девою носимо, виновнаго еже быти всяческих, яко младенцу дивяся вопияше Ему: исполнишася вся Твоего хваления.
Ирмос: Яко виде Исаиа образно на престоле превознесена Бога, от ангел славы дориносима, о окаянный, вопияше аз: провидех бо воплощаема Бога, Света невечерня, и миром владычествующа.
Слава Тебе, Боже наш, слава Тебе.
Разумев божественный старец проявленную древле пророку славу, руками Слово зря Матерними держимо: о, радуйся, вопияше, чистая, яко престол бо держиши Бога, Света невечерняго, и миром владычествующа (Дважды).
Слава: Поклонься старец, и стопам Божественне прикоснувся неискусобрачныя и Богоматере: огнь, рече, носиши Чистая, Младенца боюся объяти Бога, Света невечерняго и миром владычествующа.
И ныне: Очищается Исаиа от Серафима угль прием, старец вопияше Богоматери: Ты якоже клещами руками просвещаеши мя, подавши Егоже носиши, Света невечерняго и миром владычествующа.
Ирмос: Возопи к Тебе видев старец очима спасение, еже людем прииде от Бога Христе, Ты Бог мой.
Слава Тебе, Боже наш, слава Тебе.
Сиону Ты камень возложился еси, непокоривым претыкание, и соблазна камень: нерушимое верных спасение (Дважды).
Слава: Известне нося начертание, иже прежде век Тя израстившаго, земных за милосердие ныне немощию обложися.
И ныне: Сыну Вышняго, Сыну Девы, Богу отрочати бывшему, поклоншася Тебе, ныне отпусти с миром.
Утробу Девичу освятивый рождеством Твоим, и руце Симеоне благословивый, якоже подобаше, предварив, и ныне спасл еси нас, Христе Боже: но умири во бранех жительство и укрепи люди, ихже возлюбил еси, Едине Человеколюбче.
К Богородице притецем, хотящи Сына Ея видети, к Симеону носима, Егоже с небесе безплотнии видяще, дивляхуся глаголюще: чудная зрим ныне и преславная, непостижимая, несказанная. Иже бо Адама создавый, носится яко младенец: Невместимый вмещается на руках старчих: иже в недрех неописанных Сый Отца Своего, волею описуется плотию, а не Божеством, един Человеколюбец.
Ирмос: Тебе во огни оросившаго отроки богословившая, и в Деву нетленну всельшагося, Бога Слово поим, благочестно поюще: благословен Бог отец наших.
Слава Тебе, Боже наш, слава Тебе.
Адаму известити хотяй иду, во аде жувущу, и Еве принести благовестие, Симеон вопияше, со пророки ликуя: благословен Бог отец наших (Дважды).
Слава: Рода земна избавляяй Бог, даже до ада приидет: пленным же подаст всем оставление, и прозрение слепым, яко и немым вопити: благословен Бог отец наших.
И ныне: И Твое сердце, Нетленная, оружие пройдет, Симеон Богородице провозгласи, на кресте зрящи Твоего Сына, Емуже вопием: благословен Бог отец наших.
Ирмос: Нестерпимому огню соединившеся, благочестия предстояще юноши, пламенем же невреждени, Божественную песнь пояху: благословите вся дела Господня Господа, и превозносите во вся веки.
Слава Тебе, Боже наш, слава Тебе.
Людие Израилевы, Твою славу Еммануила, зряще Отроча из Девы, пред лицем Божественнаго ковчега ныне ликуйте: благословите вся дела Господня Господа, и превозносите во вся веки (Дважды).
Слава: Се Симеон вопияше, пререкаемое знамение Сей будет, Бог сый и отроча. Сему вернии возопиим: благословите вся дела Господня Господа, и превозносите во вся веки.
И ныне: Живот сый, Сей будет падение непокоривым, младенствовав Бог Слово, яко восстание всем верою поющим: благословите вся дела Господня Господа, и превозносите во вся веки.
Ирмос: В законе сени и писаний образ видим вернии: всяк мужеский пол, ложеснаразверзая, свят Богу. Тем Перворожденное Слово Отца Безначальна, Сына Первородящася Материю неискусомужно, величаем:
Слава Тебе, Боже наш, слава Тебе.
Иже древним новорожденных горличищ супруг, двоице же бяше птенцев, в нихже место божественный старец, и целомудренная Анна пророчица, от Девы рожденному, и Сыну Единородному Отчу, в церковь приносиму, служат величающе (Дважды).
Слава: Воздал еси мне, вопияше Симеон, спасения Твоего, Христе, радование, восприими Твоего служителя сению претружденнаго, новая благодати священнопроповедника тайнаго, во хвалении величающа.
И ныне: Священнолетно исповедашеся Анна прорицающи, целомудренная и преподобная, и старица Владыце, в церкви явственно: Богородицу же проповедающе всем сущим величаше.
Духом во святилище представ старец на руки восприят закона Владыку, вопия: ныне соуз мя плотских разреши, якоже рекл еси, с миром: видех бо очима откровение языков, и Израилю спасе.
глас 4
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя вхождение.
Премудрости, Пречистая, Тя сокровище вемы и благодати, точащую источник приснотекущий разума, просим: Твоя капли одожди, Владычице, еже воспевати Тя присно.
Превышши, Пречистая, Небес бывши, храм и палата, в храм Божий возложилася еси Тому уготоватися в Божественное жилище пришествия Его.
Свет возсиявши Богородица благодати, вся просвети и совокупи пресветлое Ея украсити торжество песньми: приидите, к Ней стецемся.
Дверь славная, помыслы непроходимая, двери отверзши храма Божия, ныне повелевает нам, совшедшим, Божественных Ея чудес насладитися.
Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в честнем вхождении Твоем венцев славы сподоби.
Невестокраситель днесь явися красный Девы храм и чертог, прием одушевленный чертог Божий, Чистую, и Непорочную, и Светлейшую всея твари.
Давид, предначиная ликование, играет, и ликовствует с нами, и Царицу зовет Тя украшену, Пречистая, предстоящу, Всечистая, в храме Царю и Богу.
Из неяже преступление произыде древле роду человеческому, из Тоя исправление и нетление процвете: Богородица днесь приводима в дом Божий.
Играют Ангельская воинства и всех человек множество, и пред лицем, Пречистая, предтекут Твоим днесь свещеносицы, зовуще величествия Твоя в дому Божии.
Возопий, Давиде, что сей настоящий праздник, Юже воспел еси иногда в книзе псаломстей, яко Дщерь Богоотроковицу и Деву. Приведутся, рече, Царю таинственно девы во след Ея и ближния Ея. И дивен соделай и всемирен праздник зовущим: Богородица нам предста, спасения Ходатаица.
Ирмос: Неизследный Божий Совет еже от Девы воплощения Тебе, Вышняго, пророк Аввакум, усмотряя, зовяше: слава силе Твоей, Господи.
Дверь непроходную Божий дом приемля днесь, престати сотвори всякой службе законной, яко истинно явися, зовый, сущим на земли Истина.
Гора присенная, юже провиде древле Аввакум, предпроповеда внутрь вместившуюся в неходных храма, добродетели процветши, и покрывает концы.
Видевши преславная вся земля странныя же и дивныя вещи, како Дева, от Ангела пищу приемлющи, образы строения носит.
Храм, и палата, и Небо одушевленное явльшися, Богоневесто Царева, во храм законный приводима днесь, Тому соблюдаема, Пречистая.
Ирмос: Ужасошася всяческая в честнем вхождении Твоем: Ты бо, Неискусобрачная Дево, внутрь вошла еси в храм Божий, якоже чистейший храм, всем воспевающим Тя мир подавающая.
Священие славное и священное возложение, днесь Пречистая Дева, возложившися в храм Божий, Всецарю нашему Богу Единому в жилище соблюдается, яко весть Сам.
Доброту, Пречистая, души Твоея зря некогда, верою Захария возопи: Ты еси избавление, Ты еси всех радость, Ты еси воззвание наше, Еюже Невместный вмещен мне явится.
О, паче ума чудес Твоих, Всечистая! Странное Твое рождество есть, странен образ возращения Твоего, странна и преславна Твоя, Богоневесто, вся и человеки несказанна.
Свещник многосветлый сущи, Богоневесто, днесь возсияла еси в дому Господни и озаряеши ны честными даровании, Чистая, чудес Твоих, Богородице всепетая.
Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.
Всяческая Носяй глаголом, молитву праведных услыша. Темже неплодныя разрешил еси недуг, яко Благоутробен, радости Виновную сим дарова.
Сказати хотя Господь языком Свое спасение, Неискусобрачную ныне от человек прият, примирения знамение и обновления.
Яко дом сущи благодати, в немже сокровища лежат неизреченнаго Божия строения, Всечистая, в храме причастилася еси нетленныя сладости.
Диадиму Тя царскую прием, храм, Богоневесто, просвещашеся и подступаше лучшим, предреченных зря на Тебе сбытие.
Пречистый храм Спасов, многоценный чертог и Дева, священное сокровище славы Божия, днесь вводится в дом Господень, благодать совводящи, Яже в Дусе Божественном, Юже воспевают Ангели Божии: Сия есть селение Небесное.
Неизреченных Божиих и Божественных таин зря в Деве благодать являемую и исполняемую явственно, радуюся и образ разумети недоумеюся, странный и неизреченный: како избранная, Чистая, Едина явися паче всея твари видимыя и разумеваемыя? Темже восхвалити хотя Сию, ужасаюся зело умом же и словом, обаче дерзая, проповедаю и величаю: Сия есть селение Небесное.
Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог благословен еси.
Се днесь возсия концем весна радостная, просвещающи нашу душу, и помышление, и ум благодатию, торжеством Богородицы днесь таинственно да учредимся.
Да дароносят днесь всяческая Царице, Матери Божии Небо и земля, и Ангелов чини, и человеков множество и да вопиют: во храм вводится Радость и Избавление.
Писание мимотече и оскуде закон, якоже сень, и благодати лучи возсияша в храм Божий вшедшей Тебе, Дево Мати Чистая, в нем благословенная.
Повинуся Рождеству Твоему, Всечистая, яко Творцу и Богу Небо, и земля, и преисподняя, и всяк язык земных исповедает, яко Господь явися, Спас душ наших.
Ирмос: Слыши, Отроковице, Дево Чистая, да речет убо Гавриил Совет Вышняго, древний, истинный: буди к приятию готова Божию, Тобою бо Невместимый с человеки поживе. Тем и радуяся, вопию: благословите, вся дела Господня, Господа.
